Tuesday, May 12, 2015

उद्योगरत्नांचा ‘मॅक्सेल’गौरव - महाराष्ट्र टाइम्स

महाराष्ट्र टाइम्स: दिनांक २ मे २०१५ 
व्यवसाय आणि उद्योगक्षेत्रामध्ये सातत्याने भरीव कामगिरी करणाऱ्या, तसेच चाकोरीबाहेरील नव्या वाटा धुंडाळणाऱ्या उद्योजकांना 'मॅक्सेल पुरस्कार २०१५' या पुरस्काराने सन्मानित करण्यात येणार आहे. १६ मे रोजी वरळी येथील नेहरू ऑडिटोरिअममध्ये महाराष्ट्राचे उद्दोग मंत्री सुभाष देसाई तसेच शिक्षण व सांस्कृतिक कार्यमंत्री विनोद तावडे यांच्या हस्ते हा सोहळा होणार आहे. शुक्रवारी महाराष्ट्र दिनाचे औचित्य साधून मॅक्सेल फाऊंडेशनकडून या पुरस्कारांची घोषणा करण्यात आली.
यंदा या पुरस्काराचे चौथे वर्ष असून दुबईतील 'आर्च ग्रुप कन्सल्टंट'चे आर्किटेक्ट अशोक कोरगांवकर यांना जीवनगौरव,
उद्योजक अशोक खाडे, मिलिंद बर्वे, मंगेश काळे, शिवानी दाणी, अक्षय वर्दे, डॉ. मेधा पुरव-सामंत यांना मॅक्सेल एक्सलन्स पुरस्काराची घोषणा करण्यात आली.

हा सोहळा निमंत्रितांच्या उपस्थितीमध्ये होणार असून यावेळी मॅक्सेल अवॉर्डचे सल्लागार वैज्ञानिक डॉ. रघुनाथ माशेलकर, ज्येष्ठ संपादक कुमार केतकर, लार्सन अॅण्ड टुब्रोचे सीईओ आणि संचालक वाय. एम. देवस्थळी, निवृत्त न्यायाधीश अरविंद सावंत, उद्योगपती सुनील देशमुख आणि मॅक्सेल फाऊंडेशनचे संस्थापक नितीन पोतदार उपस्थित राहतील.
'दास ऑफशोअर इंजिनीअरिंग लिमिटेड'चे अशोक खाडे यांची कंपनी 'ऑफशोअर फॅब्रिकेशन' मधील एक आघाडीची कंपनी म्हणून ओळखली जाते. खाडे यांचा 'एक्सलन्स इन आंत्रप्रेन्युअरशिप' या पुरस्काराने गौरव करण्यात येणार आहे. 'एचडीएफसी अॅसेट मॅनेजमेंट कंपनी'चे कार्यकारी संचालक मिलिंद बर्वे यांनी इन्व्हेस्टमेंट बँकिंगमध्ये केलेल्या कामगिरीची दखल घेऊन त्यांना एक्सलन्स इन बिझिनेस लिडरशिपने गौरवण्यात येणार आहे. 'इन्व्हेस्टमेंट मॅनेजमेंट' आणि 'मार्केट अॅनालिसीस' या विषयांवर प्रभुत्व असलेल्या नागपुरच्या शिवानी सुधांशू दाणी या 'मनीबी इन्स्टिट्यूट प्रायव्हेट लिमिटेड'च्या संचालिका आहेत. त्यांचा इमर्जिंग एक्ललन्स या पुरस्काराने गौरव करण्यात येईल. मॅन्युफॅक्चरिंग, स्टोरेज यासारख्या औद्योगिक प्रक्रियांमध्ये मोलाची निर्णायक भूमिका पार पाडू शकणारी जागतिक दर्जाची स्वयंचलित यंत्रणा विकसित करणाऱ्या मंगेश काळे यांना 'मॅक्सेल अॅवॉर्ड फॉर एक्सलन्स इन् इनोव्हेशन्स' या गौरवण्यात येणार आहे.
ग्राहकांच्या गरजेनुसार मोटारसायकल्सच्या सर्वोत्तम डिझाइन्स तयार करणाऱ्या वर्देंची मोटारसायकलच्या अक्षय वर्दे यांनाही तरुण तडफदार उद्योजक म्हणून गौरवण्यात येणार आहे. सामाजिक बदलांचे प्रभावी सशक्त साधन म्हणून अन्नपूर्णाच्या माध्यमातून सातत्याने कार्यरत असलेल्या डॉ. मेधा पुरव सामंत यांना मॅक्सेल अवॉर्ड फॉर सोशल आंत्रप्रेन्युअरशिपने सन्मानित केले जाणार आहे. मुंबईतील एका सामान्य कुटुंबातील मुलगा ते मध्य पूर्वेतील एक अत्युच्च स्थापत्यकार अशी ओळख असलेल्या 'आर्च ग्रुप कन्सल्टंट'चे संस्थापक-संचालक भागीदार अशोक कोरगांवकर यांना मॅक्सेल लाइफ टाइम अॅवॉर्डने गौरवण्यात येणार आहे.

No comments: